స్త్రీలు అత్యంత భక్తి శ్రద్ధలతో జరుపుకునే నోముల్లో ‘పోలి స్వర్గం నోము’ఒకటి.

*స్త్రీలు అత్యంత భక్తి శ్రద్ధలతో జరుపుకునే నోముల్లో ‘పోలి స్వర్గం నోము’ఒకటి.. పురాతన కాలం నుంచి తన ఉనికిని కాపాడుకుంటూ వస్తోన్న ఈ నోము, ఈ తరం స్త్రీలను కూడా ఎంతగానో ప్రభావితం చేస్తోంది. ఈ నోము జరుపుకోవడానికి కారణమైన కథ, జానపద కథలా అనిపిస్తూ వినడానికి ఆసక్తిగా.. ఆచరించడానికి ఇష్టంగా అనిపిస్తూ వుంటుంది..*

ఇక కథ లోకి వెళితే.. ఓ మారుమూల గ్రామానికి చెందిన రజక స్త్రీ కి ఐదుగురు కోడళ్లు ఉండేవాళ్లు. ఆ అయిదుగు కోడళ్లలో చివరిది.. చిన్నది అయిన కోడలే ‘పోలమ్మ’.. చిన్నప్పటి నుంచి కూడా పోలమ్మకు దైవ భక్తి ఎక్కువ. పూవులు కోయడం.. పూజలు చేయడం తోనే ఆమెకి కాలం గడిచి పోయేది. పెళ్లి జరిగేంత వరకూ దైవంతో ఆమె ఏర్పరచుకున్న అనుబంధానికి ఎలాంటి ఆటంకం కలగలేదు. కానీ, పెళ్లి అయిన తరువాత ఆమె ఆనందానికి గండి పడింది. పూవులు కోయడానికి.. పూజలు చేయడానికి.. అసలు గుడికి వెళ్లడానికి కూడా వీలు లేకుండా పోయింది. అందుకు కారణం ఆమె అత్త.

సాధారణంగా ఇంటి కోడలకి దైవ భక్తి ఎక్కువగా వుంటే ఎవరైనా మెచ్చుకుంటారు. కానీ పోలి విషయంలో అది తారుమారైంది. పోలి అత్తకు తాను మహా భక్తురాలిననే గర్వం ఎక్కువ. కొంత మంది అమ్మలక్కలు కూడా ఆమె వెనక చేరి భజన చేయడం వలన ఆమెలో మరింత అహంకారం పెరిగింది. పోలి కారణంగా తన పేరు కాస్తా పోతుందని భావించి ఆమెను మాత్రం ఇంటి పట్టున వుంచి, మిగతా కోడళ్ళను తీసుకుని గుడికి వెళ్లి వచ్చేది.

ఈ నేపథ్యంలో ఒక కార్తీక అమావాస్య రోజున పోలికి ఇంటి పనులు పురమాయించి, ఆమెకి పూజా సామాగ్రి అందుబాటులో లేకుండా చేసి మిగతా కోడళ్లతో అత్త నదీ స్నానానికి వెళ్లింది. పోలి ఏ మాత్రం బాధ పడకుండా, బావి దగ్గరే స్నానం చేసి.. పత్తి చెట్టు నుంచి పత్తి తీసి వత్తిని చేసింది. చల్ల కవ్వానికి వున్న వెన్నను తీసి దానితో దీపాన్ని వెలిగించి దైవానికి నమస్కరించింది. పోలి భక్తికి మెచ్చిన దైవం ఆమె కోసం పుష్పక విమానం పంపింది.

ఊరు జనం చూస్తుండ గానే పోలి ఆ విమానం ఎక్కింది. విమానం కొంచెం పైకి లేవగానే అక్కడికి వచ్చిన అత్త, తాను కాకుండా తన కోడలు స్వర్గానికి వెళ్లడానికి వీల్లేదంటూ పోలిని కిందకి లాగడానికి ఆమె కాళ్లు పట్టుకుంది. ఆ వెంటనే మిగతా కోడళ్లు ఒకరి తరువాత ఒకరుగా ఒకరి కాళ్లు ఒకరు పట్టుకుని విమానం నుంచి కిందకి వేలాడ సాగారు. అది చూసిన దేవతలు పోలితో వారికి పోలిక లేదంటూ విమానం నుంచి కిందకి పడ దోశారు. పోలి మాత్రం బొందితో స్వర్గానికి వెళ్లిపోయింది.

అప్పటి నుంచి ప్రతి ఏడాది ఆశ్వయుజ అమావాస్య మొదలు.. కార్తీక అమావాస్య వరకూ ప్రతి నిత్యం బ్రహ్మీ ముహూర్తంలో నిద్ర లేచి నదీ స్నానం చేసి దీపం వెలిగించి పోలి కథ చెప్పుకుని అక్షింతలు తలపై వేసుకోవడం ఆనవాయతీగా వస్తోంది..

**ఘనంగా పోలి పాడ్యమి వేడుక**

పోలి పాడ్యమి సందర్భంగా దీపాల వెలుగుల కాంతులతో కళకళలాడిన కృష్ణమ్మ..

కార్తిక మాసం ముగింపు సందర్భంగా పోలి స్వర్గం..

కార్తిక మాసం నెల రోజుల పాటు పుణ్య స్నానాలు చేసిన భక్తులు..

కార్తిక మాసం ముగింపును మార్గశిర శుద్ధ పాడ్యమిగా పిలుస్తారు..

నేడు తెల్లవారుజామునే పోలిని స్వర్గానికి పంపిన భక్తులు..

నదీ స్నానం చేసి ఆవు నేతిలో ముంచిన వత్తులను అరటి దొప్పలలో పెట్టి వెలిగించి నదిలో వదిలిన భక్తులు..

పోలి సందర్భంగా కిటకిట లాడిన భవానీ జల శంకర ఆలయం, పాత శివాలయం..

యనమలకుదురు రామలింగేశ్వర స్వామి ఆలయానికి పోటెత్తిన భక్తులు..